דברי א11

א יאא וַיִּקָּבְצוּ כָל-יִשְׂרָאֵל אֶל-דָּוִיד חֶבְרוֹנָה לֵאמֹר: הִנֵּה עַצְמְךָ וּבְשָׂרְךָ אֲנָחְנוּ. א יאב גַּם-תְּמוֹל גַּם-שִׁלְשׁוֹם גַּם בִּהְיוֹת שָׁאוּל מֶלֶךְאַתָּה הַמּוֹצִיא וְהַמֵּבִיא אֶת-יִשְׂרָאֵל וַיֹּאמֶר יְהוָה אֱלֹהֶיךָ לְךָ אַתָּה תִרְעֶה אֶת-עַמִּי אֶת-יִשְׂרָאֵל וְאַתָּה תִּהְיֶה נָגִיד עַל עַמִּי יִשְׂרָאֵל. א יאג וַיָּבֹאוּ כָּל-זִקְנֵי יִשְׂרָאֵל אֶל-הַמֶּלֶךְ חֶבְרוֹנָה וַיִּכְרֹת לָהֶם דָּוִיד בְּרִית בְּחֶבְרוֹן לִפְנֵי יְהוָה וַיִּמְשְׁחוּ אֶת-דָּוִיד לְמֶלֶךְ עַל-יִשְׂרָאֵל כִּדְבַר יְהוָה בְּיַד-שְׁמוּאֵל. א יאד וַיֵּלֶךְ דָּוִיד וְכָל-יִשְׂרָאֵל יְרוּשָׁלִַם הִיא יְבוּס וְשָׁם הַיְבוּסִי יֹשְׁבֵי הָאָרֶץ. א יאה וַיּאמְרוּ יֹשְׁבֵי יְבוּס לְדָוִיד לֹא תָבוֹא הֵנָּה וַיִּלְכֹּד דָּוִיד אֶת-מְצֻדַת צִיּוֹן הִיא עִיר דָּוִיד. א יאו וַיֹּאמֶר דָּוִידכָּל-מַכֵּה יְבוּסִי בָּרִאשׁוֹנָה יִהְיֶה לְרֹאשׁ וּלְשָׂר וַיַּעַל בָּרִאשׁוֹנָה יוֹאָב בֶּן-צְרוּיָה וַיְהִי לְרֹאשׁ. א יאז וַיֵּשֶׁב דָּוִיד בַּמְצָד עַל-כֵּן קָרְאוּ-לוֹ עִיר דָּוִיד. א יאח וַיִּבֶן הָעִיר מִסָּבִיב מִן-הַמִּלּוֹא וְעַד-הַסָּבִיב וְיוֹאָב יְחַיֶּה אֶת-שְׁאָר הָעִיר. א יאט וַיֵּלֶךְ דָּוִיד הָלוֹךְ וְגָדוֹל וַיהוָה צְבָאוֹת עִמּוֹ.

א יאי וְאֵלֶּה רָאשֵׁי הַגִּבֹּרִים אֲשֶׁר לְדָוִיד הַמִּתְחַזְּקִים עִמּוֹ בְמַלְכוּתוֹ עִם-כָּל-יִשְׂרָאֵל לְהַמְלִיכוֹכִּדְבַר יְהוָה עַל-יִשְׂרָאֵל. א יאיא וְאֵלֶּה מִסְפַּר הַגִּבֹּרִים אֲשֶׁר לְדָוִיד: יָשָׁבְעָם בֶּן-חַכְמוֹנִי רֹאשׁ השלושים (הַשָּׁלִישִׁים)הוּא-עוֹרֵר אֶת-חֲנִיתוֹ עַל-שְׁלֹשׁ-מֵאוֹת חָלָל בְּפַעַם אֶחָת. א יאיב וְאַחֲרָיו אֶלְעָזָר בֶּן-דּוֹדוֹ הָאֲחוֹחִי הוּא בִּשְׁלוֹשָׁה הַגִּבֹּרִים. א יאיג הוּא-הָיָה עִם-דָּוִיד בַּפַּס דַּמִּים וְהַפְּלִשְׁתִּים נֶאֶסְפוּ-שָׁם לַמִּלְחָמָה וַתְּהִי חֶלְקַת הַשָּׂדֶה מְלֵאָה שְׂעוֹרִים וְהָעָם נָסוּ מִפְּנֵי פְלִשְׁתִּים. א יאיד וַיִּתְיַצְּבוּ בְתוֹךְ-הַחֶלְקָה וַיַּצִּילוּהָ וַיַּכּוּ אֶת-פְּלִשְׁתִּים וַיּוֹשַׁע יְהוָה תְּשׁוּעָה גְדוֹלָה. א יאטו וַיֵּרְדוּ שְׁלוֹשָׁה מִן-הַשְּׁלוֹשִׁים רֹאשׁ עַל-הַצֻּר אֶל-דָּוִידאֶל-מְעָרַת עֲדֻלָּם וּמַחֲנֵה פְלִשְׁתִּים חֹנָה בְּעֵמֶק רְפָאִים. א יאטז וְדָוִיד אָז בַּמְּצוּדָה וּנְצִיב פְּלִשְׁתִּים אָז בְּבֵית לָחֶם. א יאיז וַיִּתְאָו דָּוִיד וַיֹּאמַר: מִי יַשְׁקֵנִי מַיִם מִבּוֹר בֵּית-לֶחֶם אֲשֶׁר בַּשָּׁעַר. א יאיח וַיִּבְקְעוּ הַשְּׁלֹשָׁה בְּמַחֲנֵה פְלִשְׁתִּים וַיִּשְׁאֲבוּ-מַיִם מִבּוֹר בֵּית-לֶחֶם אֲשֶׁר בַּשַּׁעַר וַיִּשְׂאוּ וַיָּבִאוּ אֶל-דָּוִיד וְלֹא-אָבָה דָוִיד לִשְׁתּוֹתָם וַיְנַסֵּךְ אֹתָם לַיהוָה. א יאיט וַיֹּאמֶר חָלִילָה לִּי מֵאֱלֹהַי מֵעֲשׂוֹת זֹאת הֲדַם הָאֲנָשִׁים הָאֵלֶּה אֶשְׁתֶּה בְנַפְשׁוֹתָם כִּי בְנַפְשׁוֹתָם הֱבִיאוּם וְלֹא אָבָה לִשְׁתּוֹתָם אֵלֶּה עָשׂוּ שְׁלֹשֶׁת הַגִּבּוֹרִים. א יאכ וְאַבְשַׁי אֲחִי-יוֹאָב הוּא הָיָה רֹאשׁ הַשְּׁלוֹשָׁה וְהוּא עוֹרֵר אֶת-חֲנִיתוֹ עַל-שְׁלֹשׁ מֵאוֹת חָלָל ולא- (וְלוֹ-) שֵׁם בַּשְּׁלוֹשָׁה. א יאכא מִן-הַשְּׁלוֹשָׁה בַשְּׁנַיִם נִכְבָּד וַיְהִי לָהֶם לְשָׂר וְעַד-הַשְּׁלוֹשָׁה לֹא-בָא. א יאכב בְּנָיָה בֶן-יְהוֹיָדָע בֶּן-אִישׁ-חַיִל רַב-פְּעָלִים מִן-קַבְצְאֵל הוּא הִכָּה אֵת שְׁנֵי אֲרִיאֵל מוֹאָב וְהוּא יָרַד וְהִכָּה אֶת-הָאֲרִי בְּתוֹךְ הַבּוֹר בְּיוֹם הַשָּׁלֶג. א יאכג וְהוּא-הִכָּה אֶת-הָאִישׁ הַמִּצְרִי אִישׁ מִדָּה חָמֵשׁ בָּאַמָּה וּבְיַד הַמִּצְרִי חֲנִית כִּמְנוֹר אֹרְגִים וַיֵּרֶד אֵלָיו בַּשָּׁבֶט וַיִּגְזֹל אֶת-הַחֲנִית מִיַּד הַמִּצְרִי וַיַּהַרְגֵהוּ בַּחֲנִיתוֹ. א יאכד אֵלֶּה עָשָׂה בְּנָיָהוּ בֶּן-יְהוֹיָדָע וְלוֹ-שֵׁם בִּשְׁלוֹשָׁה הַגִּבֹּרִים. א יאכה מִן-הַשְּׁלוֹשִׁים הִנּוֹ נִכְבָּד הוּא וְאֶל-הַשְּׁלֹשָׁה לֹא-בָא וַיְשִׂימֵהוּ דָוִיד עַל-מִשְׁמַעְתּוֹ. א יאכו וְגִבּוֹרֵי הַחֲיָלִים: עֲשָׂהאֵל אֲחִי יוֹאָב אֶלְחָנָן בֶּן-דּוֹדוֹ מִבֵּית לָחֶם. א יאכז שַׁמּוֹת הַהֲרוֹרִי חֶלֶץ הַפְּלוֹנִי. א יאכח עִירָא בֶן-עִקֵּשׁ הַתְּקוֹעִי אֲבִיעֶזֶר הָעַנְּתוֹתִי. א יאכט סִבְּכַי הַחֻשָׁתִי עִילַי הָאֲחוֹחִי. א יאל מַהְרַי הַנְּטֹפָתִי חֵלֶד בֶּן-בַּעֲנָה הַנְּטוֹפָתִי. א יאלא אִיתַי בֶּן-רִיבַי מִגִּבְעַת בְּנֵי בִנְיָמִן בְּנָיָה הַפִּרְעָתֹנִי. א יאלב חוּרַי מִנַּחֲלֵי גָעַשׁ אֲבִיאֵל הָעַרְבָתִי. א יאלג עַזְמָוֶת הַבַּחֲרוּמִי אֶלְיַחְבָּא הַשַּׁעַלְבֹנִי. א יאלד בְּנֵי הָשֵׁם הַגִּזוֹנִי יוֹנָתָן בֶּן-שָׁגֵה הַהֲרָרִי. א יאלה אֲחִיאָם בֶּן-שָׂכָר הַהֲרָרִי אֱלִיפַל בֶּן-אוּר. א יאלו חֵפֶר הַמְּכֵרָתִי אֲחִיָּה הַפְּלֹנִי. א יאלז חֶצְרוֹ הַכַּרְמְלִי נַעֲרַי בֶּן-אֶזְבָּי. א יאלח יוֹאֵל אֲחִי נָתָן מִבְחָר בֶּן הַגְרִי. א יאלט צֶלֶק הָעַמּוֹנִי נַחְרַי הַבֵּרֹתִי נֹשֵׂא כְּלֵי יוֹאָב בֶּן צְרוּיָה. א יאמ עִירָא הַיִּתְרִי גָּרֵב הַיִּתְרִי. א יאמא אוּרִיָּה הַחִתִּי זָבָד בֶּן-אַחְלָי. א יאמב עֲדִינָא בֶן-שִׁיזָא הָראוּבֵנִי רֹאשׁ לָראוּבֵנִיוְעָלָיו שְׁלֹשִׁים. א יאמג חָנָן בֶּן-מַעֲכָה וְיוֹשָׁפָט הַמִּתְנִי. א יאמד עֻזִּיָּא הָעַשְׁתְּרָתִי שָׁמָע ויעואל (וִיעִיאֵל) בְּנֵי חוֹתָם הָעֲרֹעֵרִי. א יאמה יְדִיעֲאֵל בֶּן-שִׁמְרִי וְיֹחָא אָחִיו הַתִּיצִי. א יאמו אֱלִיאֵל הַמַּחֲוִים וִירִיבַי וְיוֹשַׁוְיָה בְּנֵי אֶלְנָעַם וְיִתְמָה הַמּוֹאָבִי. א יאמז אֱלִיאֵל וְעוֹבֵד וְיַעֲשִׂיאֵל הַמְּצֹבָיָה.