יחז24

כדא וַיְהִי דְבַר-יְהוָה אֵלַי בַּשָּׁנָה הַתְּשִׁיעִית בַּחֹדֶשׁ הָעֲשִׂירִי בֶּעָשׂוֹר לַחֹדֶשׁ לֵאמֹר. כדב בֶּן-אָדָם כתוב- (כְּתָב-) לְךָ אֶת-שֵׁם הַיּוֹםאֶת-עֶצֶם הַיּוֹם הַזֶּה: סָמַךְ מֶלֶךְ-בָּבֶל אֶל-יְרוּשָׁלִַם בְּעֶצֶם הַיּוֹם הַזֶּה. כדג וּמְשֹׁל אֶל-בֵּית-הַמֶּרִי מָשָׁל וְאָמַרְתָּ אֲלֵיהֶם כֹּה אָמַר אֲדֹנָי יְהוִה: שְׁפֹת הַסִּיר שְׁפֹת וְגַם-יְצֹק בּוֹ מָיִם. כדד אֱסֹף נְתָחֶיהָ אֵלֶיהָ כָּל-נֵתַח טוֹב יָרֵךְ וְכָתֵף מִבְחַר עֲצָמִים מַלֵּא. כדה מִבְחַר הַצֹּאן לָקוֹחַ וְגַם דּוּר הָעֲצָמִים תַּחְתֶּיהָ רַתַּח רְתָחֶיהָ גַּם-בָּשְׁלוּ עֲצָמֶיהָ בְּתוֹכָהּ.

כדו לָכֵן כֹּה-אָמַר אֲדֹנָי יְהוִה אוֹי עִיר הַדָּמִיםסִיר אֲשֶׁר חֶלְאָתָה בָהּ וְחֶלְאָתָהּ לֹא יָצְאָה מִמֶּנָּה לִנְתָחֶיהָ לִנְתָחֶיהָ הוֹצִיאָהּ לֹא-נָפַל עָלֶיהָ גּוֹרָל. כדז כִּי דָמָהּ בְּתוֹכָהּ הָיָה עַל-צְחִיחַ סֶלַע שָׂמָתְהוּ לֹא שְׁפָכַתְהוּ עַל-הָאָרֶץ לְכַסּוֹת עָלָיו עָפָר. כדח לְהַעֲלוֹת חֵמָה לִנְקֹם נָקָם נָתַתִּי אֶת-דָּמָהּ עַל-צְחִיחַ סָלַעלְבִלְתִּי הִכָּסוֹת.

כדט לָכֵן כֹּה אָמַר אֲדֹנָי יְהוִה אוֹי עִיר הַדָּמִים גַּם-אֲנִי אַגְדִּיל הַמְּדוּרָה. כדי הַרְבֵּה הָעֵצִים הַדְלֵק הָאֵשׁ הָתֵם הַבָּשָׂר וְהַרְקַח הַמֶּרְקָחָה וְהָעֲצָמוֹת יֵחָרוּ. כדיא וְהַעֲמִידֶהָ עַל-גֶּחָלֶיהָ רֵקָה: לְמַעַן תֵּחַם וְחָרָה נְחֻשְׁתָּהּ וְנִתְּכָה בְתוֹכָהּ טֻמְאָתָהּתִּתֻּם חֶלְאָתָהּ. כדיב תְּאֻנִים הֶלְאָת וְלֹא-תֵצֵא מִמֶּנָּה רַבַּת חֶלְאָתָהּ בְּאֵשׁ חֶלְאָתָהּ. כדיג בְּטֻמְאָתֵךְ זִמָּה: יַעַן טִהַרְתִּיךְ וְלֹא טָהַרְתְּמִטֻּמְאָתֵךְ לֹא תִטְהֲרִי-עוֹד עַד-הֲנִיחִי אֶת-חֲמָתִי בָּךְ. כדיד אֲנִי יְהוָה דִּבַּרְתִּי בָּאָה וְעָשִׂיתִי לֹא-אֶפְרַע וְלֹא-אָחוּס וְלֹא אֶנָּחֵם: כִּדְרָכַיִךְ וְכַעֲלִילוֹתַיִךְ שְׁפָטוּךְ נְאֻם אֲדֹנָי יְהוִה.

כדטו וַיְהִי דְבַר-יְהוָה אֵלַי לֵאמֹר. כדטז בֶּן-אָדָם הִנְנִי לֹקֵחַ מִמְּךָ אֶת-מַחְמַד עֵינֶיךָ בְּמַגֵּפָה וְלֹא תִסְפֹּד וְלֹא תִבְכֶּה וְלוֹא תָבוֹא דִּמְעָתֶךָ. כדיז הֵאָנֵק דֹּם מֵתִים אֵבֶל לֹא-תַעֲשֶׂהפְּאֵרְךָ חֲבוֹשׁ עָלֶיךָ וּנְעָלֶיךָ תָּשִׂים בְּרַגְלֶיךָ וְלֹא תַעְטֶה עַל-שָׂפָם וְלֶחֶם אֲנָשִׁים לֹא תֹאכֵל. כדיח וָאֲדַבֵּר אֶל-הָעָם בַּבֹּקֶר וַתָּמָת אִשְׁתִּי בָּעָרֶב וָאַעַשׂ בַּבֹּקֶר כַּאֲשֶׁר צֻוֵּיתִי. כדיט וַיּאמְרוּ אֵלַי הָעָם: הֲלֹא-תַגִּיד לָנוּ מָה-אֵלֶּה לָּנוּ כִּי אַתָּה עֹשֶׂה. כדכ וָאֹמַר אֲלֵיהֶם: דְּבַר-יְהוָההָיָה אֵלַי לֵאמֹר. כדכא אֱמֹר לְבֵית יִשְׂרָאֵל כֹּה-אָמַר אֲדֹנָי יְהוִה הִנְנִי מְחַלֵּל אֶת-מִקְדָּשִׁי גְּאוֹן עֻזְּכֶם מַחְמַד עֵינֵיכֶם וּמַחְמַל נַפְשְׁכֶם וּבְנֵיכֶם וּבְנוֹתֵיכֶם אֲשֶׁר עֲזַבְתֶּם בַּחֶרֶב יִפֹּלוּ. כדכב וַעֲשִׂיתֶם כַּאֲשֶׁר עָשִׂיתִי: עַל-שָׂפָם לֹא תַעְטוּ וְלֶחֶם אֲנָשִׁים לֹא תֹאכֵלוּ. כדכג וּפְאֵרֵכֶם עַל-רָאשֵׁיכֶם וְנַעֲלֵיכֶם בְּרַגְלֵיכֶםלֹא תִסְפְּדוּ וְלֹא תִבְכּוּ וּנְמַקֹּתֶם בַּעֲוֹנֹתֵיכֶם וּנְהַמְתֶּם אִישׁ אֶל-אָחִיו. כדכד וְהָיָה יְחֶזְקֵאל לָכֶם לְמוֹפֵת כְּכֹל אֲשֶׁר-עָשָׂה תַּעֲשׂוּ: בְּבוֹאָהּוִידַעְתֶּם כִּי אֲנִי אֲדֹנָי יְהוִה.

כדכה וְאַתָּה בֶן-אָדָםהֲלוֹא בְּיוֹם קַחְתִּי מֵהֶם אֶת-מָעוּזָּם מְשׂוֹשׂ תִּפְאַרְתָּם: אֶת-מַחְמַד עֵינֵיהֶם וְאֶת-מַשָּׂא נַפְשָׁם בְּנֵיהֶם וּבְנוֹתֵיהֶם. כדכו בַּיּוֹם הַהוּא יָבוֹא הַפָּלִיט אֵלֶיךָ לְהַשְׁמָעוּת אָזְנָיִם. כדכז בַּיּוֹם הַהוּא יִפָּתַח פִּיךָ אֶת-הַפָּלִיט וּתְדַבֵּר וְלֹא תֵאָלֵם עוֹד וְהָיִיתָ לָהֶם לְמוֹפֵת וְיָדְעוּ כִּי-אֲנִי יְהוָה.