WLC - Consonants Only 1 ויהי לעת תשובת השנה לעת׀ צאת המלכים וינהג יואב את־חיל הצבא וישחת׀ את־ארץ בני־עמון ויבא ויצר את־רבה ודויד ישב בירושלם ויך יואב את־רבה ויהרסה׃ 2 ויקח דויד את־עטרת־מלכם מעל ראשו וימצאה׀ משקל ככר־זהב ובה אבן יקרה ותהי על־ראש דויד ושלל העיר הוציא הרבה מאד׃ 3 ואת־העם אשר־בה הוציא וישר במגרה ובחריצי הברזל ובמגרות וכן יעשה דויד לכל ערי בני־עמון וישב דויד וכל־העם ירושלם׃פ 4 ויהי אחריכן ותעמד מלחמה בגזר עם־פלשתים אז הכה סבכי החשתי את־ספי מילדי הרפאים ויכנעו׃ 5 ותהי־עוד מלחמה את־פלשתים ויך אלחנן בן־יעור את־לחמי אחי גלית הגתי ועץ חניתו כמנור ארגים׃ 6 ותהי־עוד מלחמה בגת ויהי׀ איש מדה ואצבעתיו שש־ושש עשרים וארבע וגם־הוא נולד להרפא׃ 7 ויחרף את־ישראל ויכהו יהונתן בן־שמעא אחי דויד׃ 8 אל נולדו להרפא בגת ויפלו ביד־דויד וביד־עבדיו׃פ Westminster Leningrad Codex. For comparative study, where possible, chapter and verse numbers are mapped to the traditional convention used by modern English texts. |
    |