יחז30

לא וַיְהִי דְבַר-יְהוָה אֵלַי לֵאמֹר. לב בֶּן-אָדָםהִנָּבֵא וְאָמַרְתָּ כֹּה אָמַר אֲדֹנָי יְהוִה: הֵילִילוּ הָהּ לַיּוֹם. לג כִּי-קָרוֹב יוֹם וְקָרוֹב יוֹם לַיהוָה: יוֹם עָנָן עֵת גּוֹיִם יִהְיֶה. לד וּבָאָה חֶרֶב בְּמִצְרַיִם וְהָיְתָה חַלְחָלָה בְּכוּשׁ בִּנְפֹל חָלָל בְּמִצְרָיִם וְלָקְחוּ הֲמוֹנָהּ וְנֶהֶרְסוּ יְסֹדוֹתֶיהָ. לה כּוּשׁ וּפוּט וְלוּד וְכָל-הָעֶרֶב וְכוּב וּבְנֵי אֶרֶץ הַבְּרִיתאִתָּם בַּחֶרֶב יִפֹּלוּ.

לו כֹּה אָמַר יְהוָה וְנָפְלוּ סֹמְכֵי מִצְרַיִם וְיָרַד גְּאוֹן עֻזָּהּ מִמִּגְדֹּל סְוֵנֵה בַּחֶרֶב יִפְּלוּ-בָהּנְאֻם אֲדֹנָי יְהוִה. לז וְנָשַׁמּוּ בְּתוֹךְ אֲרָצוֹת נְשַׁמּוֹת וְעָרָיו בְּתוֹךְ-עָרִים נַחֲרָבוֹת תִּהְיֶינָה. לח וְיָדְעוּ כִּי-אֲנִי יְהוָה בְּתִתִּי-אֵשׁ בְּמִצְרַיִם וְנִשְׁבְּרוּ כָּל-עֹזְרֶיהָ. לט בַּיּוֹם הַהוּא יֵצְאוּ מַלְאָכִים מִלְּפָנַי בַּצִּים לְהַחֲרִיד אֶת-כּוּשׁ בֶּטַח וְהָיְתָה חַלְחָלָה בָהֶם בְּיוֹם מִצְרַיִם כִּי הִנֵּה בָּאָה.

לי כֹּה אָמַר אֲדֹנָי יְהוִה: וְהִשְׁבַּתִּי אֶת-הֲמוֹן מִצְרַיִם בְּיַד נְבוּכַדְרֶאצַּר מֶלֶךְ-בָּבֶל. ליא הוּא וְעַמּוֹ אִתּוֹ עָרִיצֵי גוֹיִםמוּבָאִים לְשַׁחֵת הָאָרֶץ וְהֵרִיקוּ חַרְבוֹתָם עַל-מִצְרַיִם וּמָלְאוּ אֶת-הָאָרֶץ חָלָל. ליב וְנָתַתִּי יְאֹרִים חָרָבָה וּמָכַרְתִּי אֶת-הָאָרֶץ בְּיַד-רָעִים וַהֲשִׁמֹּתִי אֶרֶץ וּמְלֹאָהּ בְּיַד-זָרִיםאֲנִי יְהוָה דִּבַּרְתִּי.

ליג כֹּה-אָמַר אֲדֹנָי יְהוִה וְהַאֲבַדְתִּי גִלּוּלִים וְהִשְׁבַּתִּי אֱלִילִים מִנֹּף וְנָשִׂיא מֵאֶרֶץ-מִצְרַיִם לֹא יִהְיֶה-עוֹד וְנָתַתִּי יִרְאָה בְּאֶרֶץ מִצְרָיִם. ליד וַהֲשִׁמֹּתִי אֶת-פַּתְרוֹס וְנָתַתִּי אֵשׁ בְּצֹעַן וְעָשִׂיתִי שְׁפָטִים בְּנֹא. לטו וְשָׁפַכְתִּי חֲמָתִי עַל-סִין מָעוֹז מִצְרָיִם וְהִכְרַתִּי אֶת-הֲמוֹן נֹא. לטז וְנָתַתִּי אֵשׁ בְּמִצְרַיִםחוּל תחיל (תָּחוּל) סִין וְנֹא תִּהְיֶה לְהִבָּקֵעַ וְנֹף צָרֵי יוֹמָם. ליז בַּחוּרֵי אָוֶן וּפִי-בֶסֶת בַּחֶרֶב יִפֹּלוּ וְהֵנָּה בַּשְּׁבִי תֵלַכְנָה. ליח וּבִתְחַפְנְחֵס חָשַׂךְ הַיּוֹם בְּשִׁבְרִי-שָׁם אֶת-מֹטוֹת מִצְרַיִם וְנִשְׁבַּת-בָּהּ גְּאוֹן עֻזָּהּ הִיא עָנָן יְכַסֶּנָּה וּבְנוֹתֶיהָ בַּשְּׁבִי תֵלַכְנָה. ליט וְעָשִׂיתִי שְׁפָטִים בְּמִצְרָיִם וְיָדְעוּ כִּי-אֲנִי יְהוָה.

לכ וַיְהִי בְּאַחַת עֶשְׂרֵה שָׁנָה בָּרִאשׁוֹן בְּשִׁבְעָה לַחֹדֶשׁ הָיָה דְבַר-יְהוָה אֵלַי לֵאמֹר. לכא בֶּן-אָדָם אֶת-זְרוֹעַ פַּרְעֹה מֶלֶךְ-מִצְרַיִם שָׁבָרְתִּי וְהִנֵּה לֹא-חֻבְּשָׁה לָתֵת רְפֻאוֹת לָשׂוּם חִתּוּל לְחָבְשָׁהּ לְחָזְקָהּלִתְפֹּשׂ בֶּחָרֶב.

לכב לָכֵן כֹּה-אָמַר אֲדֹנָי יְהוִה הִנְנִי אֶל-פַּרְעֹה מֶלֶךְ-מִצְרַיִם וְשָׁבַרְתִּי אֶת-זְרֹעֹתָיו אֶת-הַחֲזָקָה וְאֶת-הַנִּשְׁבָּרֶת וְהִפַּלְתִּי אֶת-הַחֶרֶב מִיָּדוֹ. לכג וַהֲפִצוֹתִי אֶת-מִצְרַיִם בַּגּוֹיִם וְזֵרִיתִם בָּאֲרָצוֹת. לכד וְחִזַּקְתִּי אֶת-זְרֹעוֹת מֶלֶךְ בָּבֶל וְנָתַתִּי אֶת-חַרְבִּי בְּיָדוֹ וְשָׁבַרְתִּי אֶת-זְרֹעוֹת פַּרְעֹה וְנָאַק נַאֲקוֹת חָלָל לְפָנָיו. לכה וְהַחֲזַקְתִּי אֶת-זְרֹעוֹת מֶלֶךְ בָּבֶל וּזְרֹעוֹת פַּרְעֹה תִּפֹּלְנָה וְיָדְעוּ כִּי-אֲנִי יְהוָה בְּתִתִּי חַרְבִּי בְּיַד מֶלֶךְ-בָּבֶל וְנָטָה אוֹתָהּ אֶל-אֶרֶץ מִצְרָיִם. לכו וַהֲפִצוֹתִי אֶת-מִצְרַיִם בַּגּוֹיִם וְזֵרִיתִי אוֹתָם בָּאֲרָצוֹת וְיָדְעוּ כִּי-אֲנִי יְהוָה.