איכה2

בא אֵיכָה יָעִיב בְּאַפּוֹ אֲדֹנָי אֶת-בַּת-צִיּוֹןהִשְׁלִיךְ מִשָּׁמַיִם אֶרֶץ תִּפְאֶרֶת יִשְׂרָאֵל וְלֹא-זָכַר הֲדֹם-רַגְלָיו בְּיוֹם אַפּוֹ. בב בִּלַּע אֲדֹנָי לא (וְלֹא) חָמַל אֵת כָּל-נְאוֹת יַעֲקֹבהָרַס בְּעֶבְרָתוֹ מִבְצְרֵי בַת-יְהוּדָה הִגִּיעַ לָאָרֶץ חִלֵּל מַמְלָכָה וְשָׂרֶיהָ. בג גָּדַע בָּחֳרִי-אַף כֹּל קֶרֶן יִשְׂרָאֵלהֵשִׁיב אָחוֹר יְמִינוֹ מִפְּנֵי אוֹיֵב וַיִּבְעַר בְּיַעֲקֹב כְּאֵשׁ לֶהָבָה אָכְלָה סָבִיב. בד דֶּרֶךְ קַשְׁתּוֹ כְּאוֹיֵב נִצָּב יְמִינוֹ כְּצָר וַיַּהֲרֹג כֹּל מַחֲמַדֵּי-עָיִן בְּאֹהֶל בַּת-צִיּוֹן שָׁפַךְ כָּאֵשׁ חֲמָתוֹ. בה הָיָה אֲדֹנָי כְּאוֹיֵב בִּלַּע יִשְׂרָאֵלבִּלַּע כָּל-אַרְמְנוֹתֶיהָ שִׁחֵת מִבְצָרָיו וַיֶּרֶב בְּבַת-יְהוּדָה תַּאֲנִיָּה וַאֲנִיָּה. בו וַיַּחְמֹס כַּגַּן שֻׂכּוֹ שִׁחֵת מֹעֲדוֹ שִׁכַּח יְהוָה בְּצִיּוֹן מוֹעֵד וְשַׁבָּת וַיִּנְאַץ בְּזַעַם-אַפּוֹ מֶלֶךְ וְכֹהֵן. בז זָנַח אֲדֹנָי מִזְבְּחוֹ נִאֵר מִקְדָּשׁוֹהִסְגִּיר בְּיַד-אוֹיֵב חוֹמֹת אַרְמְנוֹתֶיהָ קוֹל נָתְנוּ בְּבֵית-יְהוָה כְּיוֹם מוֹעֵד. בח חָשַׁב יְהוָה לְהַשְׁחִית חוֹמַת בַּת-צִיּוֹןנָטָה קָו לֹא-הֵשִׁיב יָדוֹ מִבַּלֵּעַ וַיַּאֲבֶל-חֵל וְחוֹמָה יַחְדָּו אֻמְלָלוּ. בט טָבְעוּ בָאָרֶץ שְׁעָרֶיהָ אִבַּד וְשִׁבַּר בְּרִיחֶיהָ מַלְכָּהּ וְשָׂרֶיהָ בַגּוֹיִם אֵין תּוֹרָהגַּם-נְבִיאֶיהָ לֹא-מָצְאוּ חָזוֹן מֵיְהוָה. בי יֵשְׁבוּ לָאָרֶץ יִדְּמוּ זִקְנֵי בַת-צִיּוֹןהֶעֱלוּ עָפָר עַל-רֹאשָׁם חָגְרוּ שַׂקִּים הוֹרִידוּ לָאָרֶץ רֹאשָׁן בְּתוּלֹת יְרוּשָׁלִָם. ביא כָּלוּ בַדְּמָעוֹת עֵינַי חֳמַרְמְרוּ מֵעַינִשְׁפַּךְ לָאָרֶץ כְּבֵדִי עַל-שֶׁבֶר בַּת-עַמִּי: בֵּעָטֵף עוֹלֵל וְיוֹנֵק בִּרְחֹבוֹת קִרְיָה. ביב לְאִמֹּתָם יֹאמְרוּ אַיֵּה דָּגָן וָיָיִן: בְּהִתְעַטְּפָם כֶּחָלָל בִּרְחֹבוֹת עִירבְּהִשְׁתַּפֵּךְ נַפְשָׁם אֶל-חֵיק אִמֹּתָם. ביג מָה-אֲעִידֵךְ מָה אֲדַמֶּה-לָּךְ הַבַּת יְרוּשָׁלִַםמָה אַשְׁוֶה-לָּךְ וַאֲנַחֲמֵךְ בְּתוּלַת בַּת-צִיּוֹן: כִּי-גָדוֹל כַּיָּם שִׁבְרֵךְ מִי יִרְפָּא-לָךְ. ביד נְבִיאַיִךְ חָזוּ לָךְ שָׁוְא וְתָפֵל וְלֹא-גִלּוּ עַל-עֲוֹנֵךְ לְהָשִׁיב שביתך (שְׁבוּתֵךְ) וַיֶּחֱזוּ לָךְ מַשְׂאוֹת שָׁוְא וּמַדּוּחִים. בטו סָפְקוּ עָלַיִךְ כַּפַּיִם כָּל-עֹבְרֵי דֶרֶךְשָׁרְקוּ וַיָּנִעוּ רֹאשָׁם עַל-בַּת יְרוּשָׁלִָם: הֲזֹאת הָעִיר שֶׁיֹּאמְרוּ כְּלִילַת יֹפִימָשׂוֹשׂ לְכָל-הָאָרֶץ. בטז פָּצוּ עָלַיִךְ פִּיהֶם כָּל-אֹיְבַיִךְשָׁרְקוּ וַיַּחַרְקוּ-שֵׁן אָמְרוּ בִּלָּעְנוּ אַךְ זֶה הַיּוֹם שֶׁקִּוִּינֻהוּ מָצָאנוּ רָאִינוּ. ביז עָשָׂה יְהוָה אֲשֶׁר זָמָם בִּצַּע אֶמְרָתוֹ אֲשֶׁר צִוָּה מִימֵי-קֶדֶםהָרַס וְלֹא חָמָל וַיְשַׂמַּח עָלַיִךְ אוֹיֵב הֵרִים קֶרֶן צָרָיִךְ. ביח צָעַק לִבָּם אֶל-אֲדֹנָי חוֹמַת בַּת-צִיּוֹן הוֹרִידִי כַנַּחַל דִּמְעָה יוֹמָם וָלַיְלָהאַל-תִּתְּנִי פוּגַת לָךְ אַל-תִּדֹּם בַּת-עֵינֵךְ. ביט קוּמִי רֹנִּי בליל (בַלַּיְלָה) לְרֹאשׁ אַשְׁמֻרוֹתשִׁפְכִי כַמַּיִם לִבֵּךְ נֹכַח פְּנֵי אֲדֹנָי שְׂאִי אֵלָיו כַּפַּיִךְ עַל-נֶפֶשׁ עוֹלָלַיִךְהָעֲטוּפִים בְּרָעָב בְּרֹאשׁ כָּל-חוּצוֹת. בכ רְאֵה יְהוָה וְהַבִּיטָה לְמִי עוֹלַלְתָּ כֹּה: אִם-תֹּאכַלְנָה נָשִׁים פִּרְיָם עֹלְלֵי טִפֻּחִים אִם-יֵהָרֵג בְּמִקְדַּשׁ אֲדֹנָי כֹּהֵן וְנָבִיא. בכא שָׁכְבוּ לָאָרֶץ חוּצוֹת נַעַר וְזָקֵן בְּתוּלֹתַי וּבַחוּרַי נָפְלוּ בֶחָרֶב הָרַגְתָּ בְּיוֹם אַפֶּךָ טָבַחְתָּ לֹא חָמָלְתָּ. בכב תִּקְרָא כְיוֹם מוֹעֵד מְגוּרַי מִסָּבִיב וְלֹא הָיָה בְּיוֹם אַף-יְהוָה פָּלִיט וְשָׂרִיד: אֲשֶׁר-טִפַּחְתִּי וְרִבִּיתִי אֹיְבִי כִלָּם.