איכה3

גא אֲנִי הַגֶּבֶר רָאָה עֳנִי בְּשֵׁבֶט עֶבְרָתוֹ. גב אוֹתִי נָהַג וַיֹּלַךְ חֹשֶׁךְ וְלֹא-אוֹר. גג אַךְ בִּי יָשֻׁב יַהֲפֹךְ יָדוֹ כָּל-הַיּוֹם.

גד בִּלָּה בְשָׂרִי וְעוֹרִי שִׁבַּר עַצְמוֹתָי. גה בָּנָה עָלַי וַיַּקַּף רֹאשׁ וּתְלָאָה. גו בְּמַחֲשַׁכִּים הוֹשִׁיבַנִי כְּמֵתֵי עוֹלָם.

גז גָּדַר בַּעֲדִי וְלֹא אֵצֵא הִכְבִּיד נְחָשְׁתִּי. גח גַּם כִּי אֶזְעַק וַאֲשַׁוֵּעַ שָׂתַם תְּפִלָּתִי. גט גָּדַר דְּרָכַי בְּגָזִית נְתִיבֹתַי עִוָּה.

גי דֹּב אֹרֵב הוּא לִי אריה (אֲרִי) בְּמִסְתָּרִים. גיא דְּרָכַי סוֹרֵר וַיְפַשְּׁחֵנִי שָׂמַנִי שֹׁמֵם. גיב דֶּרֶךְ קַשְׁתּוֹ וַיַּצִּיבֵנִי כַּמַּטָּרָא לַחֵץ.

גיג הֵבִיא בְּכִלְיֹתָי בְּנֵי אַשְׁפָּתוֹ. גיד הָיִיתִי שְּׂחֹק לְכָל-עַמִּי נְגִינָתָם כָּל-הַיּוֹם. גטו הִשְׂבִּיעַנִי בַמְּרוֹרִים הִרְוַנִי לַעֲנָה.

גטז וַיַּגְרֵס בֶּחָצָץ שִׁנָּי הִכְפִּישַׁנִי בָּאֵפֶר. גיז וַתִּזְנַח מִשָּׁלוֹם נַפְשִׁי נָשִׁיתִי טוֹבָה. גיח וָאֹמַר אָבַד נִצְחִי וְתוֹחַלְתִּי מֵיְהוָה.

גיט זְכָר-עָנְיִי וּמְרוּדִי לַעֲנָה וָרֹאשׁ. גכ זָכוֹר תִּזְכּוֹר ותשיח (וְתָשׁוֹחַ) עָלַי נַפְשִׁי. גכא זֹאת אָשִׁיב אֶל-לִבִּי עַל-כֵּן אוֹחִיל.

גכב חַסְדֵי יְהוָה כִּי לֹא-תָמְנוּ כִּי לֹא-כָלוּ רַחֲמָיו. גכג חֲדָשִׁים לַבְּקָרִים רַבָּה אֱמוּנָתֶךָ. גכד חֶלְקִי יְהוָה אָמְרָה נַפְשִׁי עַל-כֵּן אוֹחִיל לוֹ.

גכה טוֹב יְהוָה לְקֹוָו לְנֶפֶשׁ תִּדְרְשֶׁנּוּ. גכו טוֹב וְיָחִיל וְדוּמָם לִתְשׁוּעַת יְהוָה. גכז טוֹב לַגֶּבֶר כִּי-יִשָּׂא עֹל בִּנְעוּרָיו.

גכח יֵשֵׁב בָּדָד וְיִדֹּם כִּי נָטַל עָלָיו. גכט יִתֵּן בֶּעָפָר פִּיהוּ אוּלַי יֵשׁ תִּקְוָה. גל יִתֵּן לְמַכֵּהוּ לֶחִי יִשְׂבַּע בְּחֶרְפָּה.

גלא כִּי לֹא יִזְנַח לְעוֹלָם אֲדֹנָי. גלב כִּי אִם-הוֹגָה וְרִחַם כְּרֹב חֲסָדָיו. גלג כִּי לֹא עִנָּה מִלִּבּוֹ וַיַּגֶּה בְּנֵי-אִישׁ.

גלד לְדַכֵּא תַּחַת רַגְלָיו כֹּל אֲסִירֵי אָרֶץ. גלה לְהַטּוֹת מִשְׁפַּט-גָּבֶר נֶגֶד פְּנֵי עֶלְיוֹן. גלו לְעַוֵּת אָדָם בְּרִיבוֹ אֲדֹנָי לֹא רָאָה.

גלז מִי זֶה אָמַר וַתֶּהִי אֲדֹנָי לֹא צִוָּה. גלח מִפִּי עֶלְיוֹן לֹא תֵצֵא הָרָעוֹת וְהַטּוֹב. גלט מַה-יִּתְאוֹנֵן אָדָם חָי גֶּבֶר עַל-חֲטָאָו.

גמ נַחְפְּשָׂה דְרָכֵינוּ וְנַחְקֹרָה וְנָשׁוּבָה עַד-יְהוָה. גמא נִשָּׂא לְבָבֵנוּ אֶל-כַּפָּיִם אֶל-אֵל בַּשָּׁמָיִם. גמב נַחְנוּ פָשַׁעְנוּ וּמָרִינוּ אַתָּה לֹא סָלָחְתָּ.

גמג סַכּוֹתָה בָאַף וַתִּרְדְּפֵנוּ הָרַגְתָּ לֹא חָמָלְתָּ. גמד סַכּוֹתָה בֶעָנָן לָךְ מֵעֲבוֹר תְּפִלָּה. גמה סְחִי וּמָאוֹס תְּשִׂימֵנוּ בְּקֶרֶב הָעַמִּים.

גמו פָּצוּ עָלֵינוּ פִּיהֶם כָּל-אֹיְבֵינוּ. גמז פַּחַד וָפַחַת הָיָה לָנוּ הַשֵּׁאת וְהַשָּׁבֶר. גמח פַּלְגֵי-מַיִם תֵּרַד עֵינִי עַל-שֶׁבֶר בַּת-עַמִּי.

גמט עֵינִי נִגְּרָה וְלֹא תִדְמֶה מֵאֵין הֲפֻגוֹת. גנ עַד-יַשְׁקִיף וְיֵרֶא יְהוָה מִשָּׁמָיִם. גנא עֵינִי עוֹלְלָה לְנַפְשִׁי מִכֹּל בְּנוֹת עִירִי.

גנב צוֹד צָדוּנִי כַּצִּפּוֹר אֹיְבַי חִנָּם. גנג צָמְתוּ בַבּוֹר חַיָּי וַיַּדּוּ-אֶבֶן בִּי. גנד צָפוּ-מַיִם עַל-רֹאשִׁי אָמַרְתִּי נִגְזָרְתִּי.

גנה קָרָאתִי שִׁמְךָ יְהוָה מִבּוֹר תַּחְתִּיּוֹת. גנו קוֹלִי שָׁמָעְתָּ: אַל-תַּעְלֵם אָזְנְךָ לְרַוְחָתִי לְשַׁוְעָתִי. גנז קָרַבְתָּ בְּיוֹם אֶקְרָאֶךָּ אָמַרְתָּ אַל-תִּירָא.

גנח רַבְתָּ אֲדֹנָי רִיבֵי נַפְשִׁי גָּאַלְתָּ חַיָּי. גנט רָאִיתָה יְהוָה עַוָּתָתִי שָׁפְטָה מִשְׁפָּטִי. גס רָאִיתָה כָּל-נִקְמָתָםכָּל-מַחְשְׁבֹתָם לִי.

גסא שָׁמַעְתָּ חֶרְפָּתָם יְהוָה כָּל-מַחְשְׁבֹתָם עָלָי. גסב שִׂפְתֵי קָמַי וְהֶגְיוֹנָם עָלַי כָּל-הַיּוֹם. גסג שִׁבְתָּם וְקִימָתָם הַבִּיטָה אֲנִי מַנְגִּינָתָם.

גסד תָּשִׁיב לָהֶם גְּמוּל יְהוָה כְּמַעֲשֵׂה יְדֵיהֶם. גסה תִּתֵּן לָהֶם מְגִנַּת-לֵב תַּאֲלָתְךָ לָהֶם. גסו תִּרְדֹּף בְּאַף וְתַשְׁמִידֵם מִתַּחַת שְׁמֵי יְהוָה.