Assalaman

1Širawt a din-tǝfâlat nak Bulǝs ǝd Silfanus ǝd Timotay. Nǝhul-in Ǝlkǝnisat ta n ǝɣrǝm ǝn Tesalonik tǝmosat tamattay tǝrtâyat ǝd Mǝššina di n Abba-nana, d Ǝmǝli Ɣaysa Ǝlmǝsix. 2Ikf-iwan Mǝššina di n Abba-nana d Ǝmǝli Ɣaysa Ǝlmǝsix arraxmat d alxer.

Ǝššǝriɣa wa zʼagin ɣur tawaɣlay n Ǝlmǝsix

3Imǝdrayan-nana, iwâr-ana ad nǝtigudǝy i Mǝššina faw daɣ talɣa-nawan. Imos adi arat as inihagga a tu-nagu fǝlas ǝzǝgzan-nawan a itittǝyan wǝllen, itittǝy ǝntada ǝnǝmǝra-nawan. 4Adi da a fǝlas nakkanay iman-nana nǝsanamal fall-awan daɣ Ǝlkǝnisaten šin hadatnen ǝn Mǝššina. Nǝmmâl zǝmmerat-nawan d ǝzǝgzan-nawan daɣ ǝtǝwǝdgaz kul wa tatawaggam d arkanay wa tǝnnayam.

5Isitadda adi aqqad n ǝššǝriɣa ǝn Mǝššina, amaran adi da a kawan-z-issǝhǝran ǝd taɣmar-net ta fǝl tǝnnayam arkanay. 6Arat oɣâdan ɣur Mǝššina a imos ad izzǝzǝl daɣ win kawan-zaɣazzabnen. 7Amaran kawanay win taɣazzabnen ǝmǝrǝdda, a kawan-akfu tǝsasmit akf-anaq-qat nakkanay da. Arat wa, ad agu assaɣa wa du-z-inǝfilǝl Ɣaysa Ǝlmǝsix ifâl-du jǝnnawan ǝnta d angalosan-net ǝlanen tarna, 8daɣ ammas ǝn tǝmsay tǝbilaglagat fǝl ad awwaddab aytedan win wǝr nǝssen Mǝššina, ugayan ǝs lǝkkum y Ǝlinjil n Ǝmǝli-nana Ɣaysa Ǝlmǝsix. 9Attadib-nasan, ad iqqǝl ahluk iɣlâlan, nǝmǝggǝgan d Ǝmǝli-nana. Wǝr dasan-ilkem anay ǝn tanaya ǝn tarna-net. 10Adi kul ad agu ǝzǝl wa du-z-azzabbat Ɣaysa iha ammas n aytedan win mizdagan ǝd win sǝr-ǝs ǝzzǝgzannen kul fǝl ad t-ǝssǝɣmǝran ad t-ǝmmalan. Kawanay da a tan-tǝggǝzam ǝzǝl wǝdi fǝlas tǝzzigzanam isalan win dawan-nǝga. 11Adi a fǝl dawan-nǝtansay Ǝmǝli-nana faw a kawan-issǝharan ǝd tarrayt ta daq-qawan iga. Nǝgammay daɣ-as ad assandu ǝs tarna-net deranan-nawan kul win olaɣnen, agu deɣ ǝzǝgzan-nawan arat tǝha tǝnfa. 12Ǝddi ad za tǝssǝɣmǝram esǝm n Ǝmǝli-nana Ɣaysa, issǝɣmǝr-kawan ǝnta da s arraxmat ǝn Mǝššina d Ǝmǝli-nana Ɣaysa Ǝlmǝsix.