Bulǝs imâl tarrayt tǝmosat ǝssir ta d-iga Mǝššina – Ǝššǝɣǝl ǝn Bulǝs

1Awen daɣ a fǝl ǝmosa nak Bulǝs, amaskasaw n Ǝlmǝsix [Ɣaysa] fǝl ǝddǝlil-nawan, kawanay a wǝr nǝmos Kǝl-Ǝlyǝhud. 2A igan da tǝgrâwam isalan n ǝzuk wa di-issǝwar Mǝššina daɣ batu n arraxmat-net ta di-tǝtawakfat fǝl tǝnfa-nawan. 3Almaɣna Mǝššina a di-isannafalalan ǝssir ǝn tarrayt ta d-iga, s ǝnta a ǝktaba da imos arat ǝn tǝfir. 4As tǝɣram awa ǝktaba da, ad tǝnǝyam awa dǝr-ogda ǝgǝrri a ǝgeɣ y ǝssir n Ǝlmǝsix. 5Ǝssir wa, wǝr tǝtawakfa masnat-net y aytedan n azzaman win okaynen, zun ǝmmǝk was itawasanafalal ǝmǝrǝdda ǝs tarrayt n Infas wa Zǝddigan i nǝmmuzal n Ǝlmǝsix d ǝnnǝbitan-net a zaddognen. 6Ǝssir wen ǝnta da: Aytedan win wǝr nǝmos Kǝl-Ǝlyǝhud, ǝd mǝzzǝgzan s Ǝlmǝsix win ǝmosnen Kǝl-Ǝlyǝhud ǝgrâwan tǝkasit, ǝqqalan taɣǝssa iyyadda, ǝqqalan deɣ arat iyyanda ǝs tarrayt ǝn tassaq ta ǝgan d Ǝlmǝsix daɣ arkawal wa ihan Ǝlinjil. 7Ǝlmǝsix en daɣ as ǝqqalaɣ amaššaɣal-net a t-iɣbâdan, s ǝssǝbab ǝn tarna ǝn tǝhǝkkut ǝn Mǝššina tǝgât s arraxmat-net ta ǝgrawa.

8Nak a ogaran tǝmmǝdrǝyt daɣ mǝzzǝgzan di ǝn mizdagan ǝn Mǝššina ketnasan, mišan ǝgrâwaɣ arraxmat ta, a tat-imosan: Igi y aytedan win wǝr nǝmos Kǝl-Ǝlyǝhud isalan n Ǝlinjil, imosan isalan n arraxmaten n Ǝlmǝsix as tu-wǝr-illa i ifrâgan ǝgǝrri-nasnat. 9Sǝnnǝfilǝla deɣ y aytedan [kul], ǝmmǝk was innǝzzam Mǝššina tarrayt ta, har tat-iɣrad ǝsǝkmǝl. Tarrayt ten, harwa daɣ tizarat a tat-iga Mǝššina a d-ixlakan arat kul, tǝmos ǝssir. 10Ǝnǝfilal wa tǝga tarrayt ta, ǝnta a du-z-awǝyan ǝmǝrǝdda as taɣmaren ǝd tǝmǝnukǝla šin jǝnnawan, ad ǝzdǝynat assayfaten wǝr nǝla ǝddukad a tǝmos masnat ta n Mǝššina. Arat wen tarrayt n Ǝlkǝnisat as zʼagu. 11Amaran awen ad agu s ǝmmǝk was t-innǝzzam Mǝššina imos arat iɣlalan, ikmal-du deɣ daɣ Ǝlmǝsix Ɣaysa Ǝmǝli-nana. 12Tassaq ta nǝga d Ǝlmǝsix Ɣaysa ǝs tarrayt n ǝzǝgzan sǝr-ǝs a danaɣ-tǝkfat tǝdarfit n ad nǝfrǝg ǝnǝmihaz ǝd Mǝššina ǝs tǝflǝst. 13Daɣ adi ǝgmaya daɣ-wan ad wǝr tǝqqǝlam ǝlǝqqam fǝl ǝddǝlil n alɣazab wa tagga da fǝl ǝddǝlil-nawan. Alɣazab wa ǝnta a kawan-z-akfin tanaya.

Tǝwatray ta iga Bulǝs fǝl ad tǝtǝwǝssǝn tara ta n Mǝššina

14Awen daɣ a fǝl ǝssǝjada dat Mǝššina di n Abba, 15s ǝnta a igan esǝm y id t-illa aɣaywan kul daɣ jǝnnawan d amaḍal. 16Awalla! Ǝgmâyaɣ daɣ-as ad aknu ǝssǝsuhi ǝn wallan-nawan ǝs tarrayt n Infas-net wa Zǝddigan s ǝssǝbab ǝn tanaya-net tǝkmâlat. 17Onsâyaq-qu ad izdǝɣ Ǝlmǝsix daɣ wallan-nawan, ǝs tarrayt n ǝzǝgzan-nawan, id tǝqqalam aytedan zizawatnen wǝllen sihaddan deɣ fǝl tara. 18Onsâyaq-qu daɣ adi ad taknim ǝzǝzzǝwi daɣ ǝzǝgzan-nawan, tǝfrǝgam ad tǝmǝsǝsǝgrim ǝd mǝzzǝgzan di zaddognen kul daɣ batu ǝn tara n Ǝlmǝsix tǝknât ilwi fǝl aganna kul, 19tǝzdǝyam deɣ tara ten tǝllât dǝnnǝg masnat kul. Ǝddi a kawan-za-tǝdkǝr tanaya ǝn Mǝššina s ǝmmǝk ikmâlan.

20Ǝmmǝk en daɣ âs Mǝššina ifrâg ad agu y arat kul igi ofân wa daɣ-as nǝgmay, ofa deɣ awa nǝɣil. Arat wen, itagg-ay ǝs tarna-net ta daɣ-na tǝšɣalat. 21Igrǝwet Mǝššina ǝtǝwǝsǝɣmar daɣ Ǝlkǝnisat igâ awen daɣ tassaq d Ǝlmǝsix daɣ azzaman kul har faw. Amin.