1 - 3 Ya Tayofil wa ǝkneɣ saɣmar, aytedan aggotnen a ǝktabnen isalan n awa ɣur-naɣ igan, s ǝmmǝk iman-net was dana-tan-ǝssoɣalan aytedan win tan-ǝggǝyatnen ǝs šittawen-nasan harwa ɣur ǝnǝtti-nasan, ǝqqalan aytedan ǝšɣâlnen daɣ amel n awal ǝn Mǝššina. Awen da fǝl di-d-iggaz nak da, dǝffǝr as ǝššiggaraɣ isalan di kul s ǝlluɣ a d-ibazan ɣur ǝlǝsǝl-nasan, a dak-in-aga y-asan akatab innizzaman, 4fǝl ad tǝkkǝsaɣ aššak as tǝssunen šin tǝtǝwasasaɣra ǝttiddanat.

Ǝtǝmǝl ǝn tǝhǝwt n ǝnnǝbi Yaxya wa isalmaɣan aytedan daɣ aman

5Elan win daɣ imos Herod ǝmǝnokal n akal ǝn Yahudǝyya, ill-ay ǝlimam iyyan igân esǝm Zakarayya ihân taggayt ǝn limaman win hayawan n Abǝya. Tantut-net tahayawt ǝn Harun, esǝm-net Elizabet. 6Ǝnta dǝr-ǝs ǝmosan alɣadilan dat Mǝššina, ǝgân y alwajiban n Ǝmǝli d alamaran-net lǝkkum daɣ wǝr ǝlen lahan waliyyan. 7Wǝr ǝlen barar waliyyan fǝlas Elizabet a wǝr nǝtilu bararan, ǝgmâdan-tan deɣ elan wǝllen.

8Ǝzǝl iyyan itaggu Zakarayya dat Mǝššina ǝššǝɣǝl wa taggin limaman fǝlas taggayt ǝn limaman ta iha as d-issǝɣlay igi n awen. 9Ǝbaznat-tu tašaɣeren, ǝmosnen as, ǝnta a zʼiggǝzan edag wa zǝddigan daɣ Ahan wa Zǝwwǝran n Ǝlɣibada n Ǝmǝli, issǝqqǝd daɣ-as aḍutan fǝl majmar wa iskatan y awen. Šišaɣeren šin imos igi-nasnat alɣadat ǝn limaman. 10As iga alwaq wa daɣ taqqadan aḍutan, tamattay ketnet tǝbdâd daɣ tǝfǝrray n Ahan wa Zǝwwǝran n Ǝlɣibada, tǝtattar.

11Wala a ihogan inafalal-as-du angalos n Ǝmǝli ibdâd daɣ ǝɣil ǝn majmar wa n ǝsǝqqǝd n aḍutan. 12Inay Zakarayya angalos ɣas irmaɣ, tǝggaz-tu tasa. 13Mišan inn-as angalos: «Zakarayya! A kay wǝr tǝggǝz tasa fǝlas Mǝššina iqbâl mansay-nak, tantut-nak Elizabet ad tǝgrǝw barar, amaran ag-as esǝm Yaxya. 14Ad taddaweɣ, tǝfǝliwǝsaɣ; tǝsǝddǝwǝt deɣ tǝhǝwt-net aytedan aggotnen, 15amaran ad iqqǝl awedan zǝwwǝran dat Ǝmǝli. Wǝr mad as zʼašu esmad n alɣanab wala deɣ esmad waliyyan. Ad t-idnǝy Infas Wa Zǝddigan harwa da iha tadist n anna-net. 16Ad d-issuɣǝl Kǝl-Israyil aggotnen Ǝmǝli-nasan Mǝššina. 17Ǝnta a du-z-izaran y Ǝmǝli imos anammazul-net, igrâw Infas Wa Zǝddigan ǝd tarna šilat ǝn win igraw ǝnnǝbi Ilyas, fǝl a d-awǝy alxer gǝr aytedan ǝd bararan-nasan, awǝy-du inǝmmǝzray s ad ilen tayttay ta ǝlan aytedan win ǝɣdalnen. Tǝmǝwit tǝdi as zʼisǝmmutǝg y Ǝmǝli tamattay tǝsimatagat i lǝkkum y-as.»

18Tǝzzar inna Zakarayya y angalos: «Mǝni alɣalamat ta di-za-tǝssusǝnat as adi ad agu? Ǝnta nak aɣmar waššaran a ǝmosa, tantut-in deɣ ǝglân daɣ-as elan wǝllen.» 19Inn-as Angalos: «Awa nak Jibril, akli ǝn Mǝššina wa dat-ǝs ibaddadan. Ǝnta a di-d-izimmazalan sǝr-ǝk y a dak-agaɣ isalan hossaynen win di. 20Amaran dad zamas wǝr tǝzzǝgzanaɣ isalan win dak-ǝgeɣ da, as zʼandinen daɣ alwaq-nasan, ad ammadad ǝmi-nak. Wǝr za tǝlǝsaɣ awal iket wǝr d-osa ǝzǝl wa daɣ zʼagu arat wǝdi.»

21Awen as itaggu tamattay tǝqqâl i Zakarayya, ǝqqânan ɣafawan-nasan y awa t-in-isahhagan daɣ adag wa zǝddigan. 22As t-id-igmad, indar-as a dasan-iššiwǝl fǝlas imi-net a immǝdadan, a dasan-isidugun. Ǝssanan as arat iyyan a das-d-inafalalan.

23As issǝnda adan-net win ǝššǝɣǝl daɣ Ahan wa Zǝwwǝran n Ǝlɣibada, iqqal aɣaywan-net.

24Dǝffǝr awen tǝga tantut-net Elizabet tadist, tǝzzar tǝgdal i man-net ǝtǝwǝnay har tǝga sǝmmosat tǝlil, tǝgannu: 25«Awa igi n Ǝmǝli! Ǝnta daɣ-i issanan, ikkas-i asakor wa di-ǝggatan aytedan.»

Ǝtǝmǝl ǝn tǝhǝwt ǝn Ɣaysa

26Tǝha Elizabet tallit-net ta n sǝdisat as izammazal Mǝššina angalos Jibril s ǝɣrǝm as itawannu Nazaret ihân akal ǝn Galilaya. 27Issok-ay tǝmawat iyyat wǝr nǝzday meddan harwada tǝgât esǝm Maryama. Amaran Maryama tǝsimarkas d alǝs igân esǝm Yusǝf, imosan arat daɣ ǝzzurrǝyya n ǝmǝnokal Dawǝd wa n ǝnnǝbi. 28Os-et-du angalos, inn-as: «Maryama, ma tǝxlaka! Ǝmǝli izizabbat-du fall-am arraxmat-net. Issân daɣ-am.» 29Iqqan awal wen eɣaf ǝn Maryama, idgaz-tat, tǝzzar ad tǝsamadran awa imos almaɣna n assalam wen.

30Inn-as angalos: «A kam-wǝr-tǝgǝz tasa Maryama, Mǝššina izizzabbat-du fall-am arraxmat-net. 31Ad taga tadist, tǝgrǝwa barar, tagaɣ-as esǝm Ɣaysa. 32Ad itǝwǝsǝɣmǝr, agu esǝm Barar ǝn Mǝššina di n Amadkol. Ad t-akfu Ǝmǝli Mǝššina taɣmar n amaraw-net Dawǝd, 33izar i hayawan ǝn Yaqub har faw, amaran tǝmǝnukǝla-net ad tǝɣlǝl.»

34Tǝnna Maryama y angalos: «Manǝmmǝk as zʼagu adi ǝnta nak harwada wǝr ǝzdaya meddan?» 35Inn-as angalos: «A fall-am d-azzabbat Infas wa Zǝddigan, talsim tanaya ǝn Mǝššina di n Amadkol, tǝqqǝl-am zun telay, awen da fǝlas barar wa za tileɣ ad agu esǝm Ǝmizdag agu deɣ esǝm Barar ǝn Mǝššina. 36Ǝnâm tǝšǝqqaq-nam Elizabet! Ǝglân daɣ-as elan wǝllen mišan tǝga tadist ǝn barar. Ǝnta tas itawannu wǝr tǝtilu bararan, tallit-net ta n sǝdisat a tǝha ǝmǝrǝdda, 37fǝlas wǝr t-illa a imosan muxal fǝl Mǝššina.»

38Tǝnn-as Maryama: «Nak taklit n Ǝmǝli, itǝwǝgget-i awa tǝnneɣ.» Tǝzzar ifal-tat angalos.

Iki ǝn Maryama Elizabet

39Tǝnkar Maryama daɣ adan en da, tǝhaz tǝkka taɣrǝmt iyyat n akal ǝn Yahudǝyya imosan akal n ǝdɣaɣan. 40Tos-in ehan ǝn Zakarayya, tǝssǝslam fǝl Elizabet. 41Da da ɣas ad tǝsla Elizabet y assalam ǝn Maryama ǝnta ad izabaggat barar wa ihan tadist n Elizabet, tǝzzar idnay-tat Infas wa Zǝddigan. 42Tǝdkal Elizabet ǝmǝsli-net, tǝnna: «Togara šidoden kul agaraw n arraxmat, barar deɣ wa du-z-igmǝdan tadist-nam igrâw arraxmat. 43Awak nak ma ǝmosa as di-du-tǝtasu anna n Ǝmǝli-nin? 44Da da ɣas ad ǝsleɣ y assalam-nam ǝnta ad izabaggat barar wa ihan tadist-in fǝl tǝdǝwit. 45Tǝbbilalaɣ kam tǝzzigzanat as, awa dam-inna Ǝmǝli ad andu.»

Tǝmmal ta tǝga Maryama i Mǝššina

46Tǝnna Maryama:

«Ǝwǝl-in immâl adkul n Ǝmǝli,

47Iman-in isidawat-tan Mǝššina

di n Ǝmaɣlas-in.

48Fǝlas asawad a din-iga

daɣ tǝmmǝdrǝyt ǝn tǝklit-net.

A ibazan ɣur ǝmǝrǝdda

aytedan n azzaman kul ad annin ǝbbilalaɣ.

49Fǝlas Wa ilan Tarna ig-i aratan zawwarnen.

Esǝm-net i zǝddigan.

50Itihǝnǝttit y aytedan n azzaman kul

win t-ǝksudnen.

51Iga ǝfus-net imazalan ǝn tǝla ǝn tarna.

Iziwazawaz aytedan win ǝdkalnen iman-nasan.

52Ikkas daw muzaran taɣmar-nasan,

idkal šilǝqqawen.

53Isayyawan win ǝlluznen daɣ awa izodan,

oyya imǝggǝrgas ǝqquran fassan-nasan.

54Idhal Kǝl-Israyil n eklan-net,

fǝlas itihǝnǝttit

55y Ibrahim d ǝzzurrǝyya-net har faw,

imos awen arkawal iga i marawan-nana.»

56Tǝmal Maryama ɣur Elizabet har tǝga edag ǝn karadat tǝlil amaran tǝqqal aɣaywan-net.

Tǝhǝwt ǝn Yaxya wa isalmaɣan daɣ aman

57Osa-du alwaq n iguz n ǝmzur fǝl Elizabet, tǝgraw barar. 58Ǝslan mahharagan-net ǝd šǝqqaɣan-net ǝhǝnǝtta zǝwwǝran wa das-iga Mǝššina da, ǝddǝwen ǝntanay da.

59As ǝzǝl wa n ǝttam osan-du y ad sǝmmǝmkǝdan barar. Ǝrân a das-agin esǝm Zakarayya, esǝm wa daɣ iga abba-net. 60Mišan tǝnn-asan anna-net: «Kala kala! Ad agu esǝm Yaxya.» 61Ǝnnan-as: «Esǝm ya wǝdi wǝr tǝleɣ ǝšǝqqaɣ a t-igân!»

62Tǝzzar ad sidugunan y abba ǝn barar, y a dasan-imǝl esǝm was ira ad t-agu barar-net. 63Isaddagan-asan Zakarayya a t-id-akfin ǝsǝllum. Iktab fall-as: «Esǝm-net Yaxya.» Isammaklal sǝr-san awen ketnasan. 64Tǝzzar okay ǝmǝdǝd Zakarayya amazay wen da, immora ilǝs-net, ad itaggu tǝmmalen i Mǝššina.

65Tǝggaz tasa aytedan kul win ǝxsarnen daɣ ihǝz-nasan, wazawazan salan n awa igan den daɣ akal ǝn Yahudǝyya ketnet wa n ǝdɣaɣan. 66Aytedan kul win ǝslanen awen ǝtaffan-tu daɣ wallan-nasan, gannin: «Ma zʼiqqǝl wa da barar?» Illikan as issiwar-tu Ǝmǝli ǝfus-net.

Tǝmmal ta iga Zakarayya i Mǝššina

67Idnay Infas wa Zǝddigan Zakarayya wa n abba ǝn barar, isannafalal-as Mǝššina awal-net, ad igannu:

68«Tǝmmal i Mǝššina,

Ǝmǝli n Israyil,

fǝlas masnat a iga daɣ tamattay-net,

isaddarf-tat.

69Ikkas-ana-du daɣ ahan n ǝkli-net

Dawǝd Amaɣlas ilân tarna,

70 - 71a dana-z-agǝzan daɣ zǝnga-nana,

ikkǝs-ana daɣ fassan ǝn maksanan-nana kul.

Imos awen arkawal iga daɣ mawan n ǝnnǝbitan-net

win irǝw, isinafran.

72Ǝmmǝk wǝdi as issǝkna tǝhanint-net

i marawan-nana,

issǝnda arkawal ǝn tassaq-net

zǝddigan.

73Arkawal wen ihâd fall-as

y amaraw-nana Ibrahim as,

74a danaɣ-assafsu daɣ zǝnga-nana,

fǝl a tu-nǝɣbǝd ši wala tasa ǝn waliyyan.

75Nǝzǝddig noɣâd iket nǝddar.

76Amaran kay barar-in,

a kay iwǝr esǝm ǝnnǝbi ǝn Mǝššina di n Amadkol,

kay a du-z-izaran y Ǝmǝli

fǝl a dat-ǝs takna tarrayt-net,

77tǝssusǝna tamattay-net

as efsan ǝllân ɣur tǝsureft ǝn bakkadan.

78Awen itagg-ay Ǝmǝli-nana Mǝššina

fǝl ǝssǝbab ǝn tǝhanint tagget ta tu-tǝhat.

Adi a fǝl dana-du-z-asu Ǝlmǝsix

ola ǝd gǝmmud ǝn tǝfuk,

79fǝl ad imǝlǝwlǝw ǝnnur-net

fǝl aytedan win ǝqqimnen daɣ šiyyay,

ǝhân telay ǝn tǝmattant,

izǝzzǝlulǝɣ takkolen-nana daɣ tarrayt ta n alxer.»

80Ad idaggal Yaxya, tǝtawad-t-id tayttay-net. Izdaɣ ikallan ǝn saffan har ǝzǝl wad issosan Kǝl-Israyil fǝl man-net.